ADAT KOMERING:ANDI-ANDI(PESAN MORAL)

Karya: Syahrial Niti (Bantan)

 

Aaii…naa…puu….n

Tamong kuti ja pesta

Hanjung tuhanku robbi

Niku kok mangsa kanca

Tawok purikah gawi

Nyak miwang suwa maha

Barong kabar ku dengi

Mak nyandang nyak nyerita

Tabik samo sekali

Bai bakas na gohgoh da

Unyin mong tegak ginti

Sa koh koh tawai jeda

Tamong cembuan hati

Sikam mong ngalimpura

Kira salah ti biti

Jak sikam hurik paija

Haropan mak tediri

Cuntu na maso sija

Benor sikam nengani

Kimak kok sumang cara

Ram mak pu lunglung lagi

Tamong tiong kon dia

Sirok ko dilom hati

Hurik sa mak wat lana

Sija guai da kunci

Guna kuti sikola

Gaman ngelar kondiri

Walau merantau dipa

Pok tetop tamtu tini

Redik jawoh hantara

Dang lupo rik bujadi

Indoh na tian tuha

Tabik penoknok kuti

Sok badan lekok ngura

Mawas manom harani

Dang mudah rasa buya

Ngunut badan puranti

Dang rihna bak denia

Sina kadar penguji

Sembahyang ram se lima

Kunci segala kunci

Setamtu na dang lupa

Ibot ram hurik mati

Kintu tigoh masona

Kuti lamon rejeki

Andai kiinah hareta

Iringi kayo hati

Cembuan lebas buya

Muloh pasal be jadi

Indoh na tian tuhha

Dirani kadang buri

Basing gawi mak kawa

Daya mak mangka lagi

Haga rintok rik sapa

Kuti se betik hati

Sija habis cerita

Tabik diunyin kuti

Sikam bu tangguh ganta

Mak ikin mengan lagi

Haga muloh radu sa

Kohkoh kok kena dengi

Unyin na layon suya

Guai da ubat diri

Akuk kuti punus na

Gaman di kadang buri